ထောင် ၁၁ နှစ်ချထားသည့် အမေရိကန် ဂျာနယ်လစ် ကို စစ်ကောင်စီ ပြန်လွှတ်ပေး

အဲဟ်လေ့ဘိုက်(သ) (အလိုင်ဟေမွစ်စလာမ်) သတင်းဌာန ၊ အဗ်နာ
 


ပြီးခဲ့တဲ့တစ်ပတ်က ထောင်ဒဏ် ၁၁ နှစ်ချခဲ့တဲ့ အမေရိကန်ဂျာနယ်လစ် ဒန်နီဖန်စတာကို ​စစ်ကောင်စီက ဒီကနေ့မှာ ပြန်လွှတ်ပေးလိုက်ပါတယ်။

အင်းစိန်ထောင်ရှိရာ ရန်ကုန်ကနေ နေပြည်တော်ကိုပို့ပြီး နယ်နှင်ဒဏ်ပေးလိုက်တာလို့ စစ်ကောင်စီ ရင်းမြစ်တစ်ခုက AFP သတင်းဌာနကို ပြောပါတယ်။ စစ်ကောင်စီ ပြောရေးဆိုခွင့်ရှိသူ ဗိုလ်မှူးချုပ် ဇော်မင်းထွန်းကလည်း ဖန်စတာလွတ်မြောက်တဲ့ သတင်းကို အတည်ပြုပါတယ်။

နေပြည်တော်လေဆိပ်က ရင်းမြစ်တစ်ခုက ဖန်စတာ ထွက်ခွာသွားပြီဖြစ်ကြောင်း အတည်ပြုပေမယ့် ခရီးစဉ်အသေးစိတ်ကို မပြောခဲ့ပါဘူး။

မြန်မာနိုင်ငံကို ရောက်နေတဲ့ အမေရိကန်သံအမတ်ဟောင်း ဘီလ် ရစ်ချက်ဆန်က ဖန်စတာဟာ သူ့လက်ထဲရောက်လာပြီး ကာတာကနေတစ်ဆင့် အမေရိကန်ကို ပြန်မှာဖြစ်တယ်လို့ ပြောကြားခဲ့ပါတယ်။

ရစ်ချန်ဆန်ဟာ လူသားချင်းစာနာထောက်ထားမှုဆိုင်ရာ အကူအညီပေးရေး ခရီးစဉ်အဖြစ် မြန်မာနိုင်ငံကို အခုလ အစောပိုင်းကစတင်ပြီး ရောက်ရှိနေတာ ဖြစ်ပါတယ်။

အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်နဲ့တွေ့ဆုံခဲ့ပြီး ကိုဗစ်တိုက်ဖျက်ရေး အပါအဝင် အကူအညီပေးရေးကိစ္စတွေကို ဆွေးနွေးခဲ့ကြောင်း၊ နိုင်ငံရေးကို လုံးဝမပြောခဲ့ကြောင်း ရစ်ချက်ဆန်က သတင်းထုတ်ပြန်ထားပါတယ်။

မြောက်ကိုရီးယားလို အမေရိကန်နဲ့ ရန်ဘက်နိုင်ငံတွေမှာ ဖမ်းဆီးခံထားရတဲ့ အမေရိကန်နိုင်ငံသားတွေ လွတ်မြောက်ရေး ကြိုးပမ်းမှုမှာ ရစ်ချက်ဆန်က နာမည်ကျော်ပြီး မြန်မာနိုင်ငံခရီးစဉ် မတိုင်ခင်က ဖန်စတာ လွတ်မြောက်ရေး စစ်ကောင်စီနဲ့ ညှိနှိုင်းမှာလားဆိုတာကို ရစ်ချက်ဆန်ရဲ့ ပြောရေးဆိုခွင့်ရှိသူက မှတ်ချက်မပေးခဲ့ပါဘူး။

Frontier Myanmar ဂျာနယ်လစ် ဖန်စတာကို စစ်ကောင်စီက မေလက ရန်ကုန် နိုင်ငံတကာ လေဆိပ်မှာ ဖမ်းဆီးပြီး အင်းစိန်ထောင်မှာ ချုပ်ထားကာ တရားစွဲဆိုခဲ့တာပါ။

ပြီးခဲ့တဲ့တစ်ပတ်မှာတော့ ဖန်စတာဟာ လူဝင်မှုကြီးကြပ်ရေးဥပဒေ၊ မတရားအသင်း ဆက်သွယ်မှုဥပဒေနဲ့ ထောင်ဒဏ် ၁၁ နှစ်ချမှတ် ခံခဲ့ရပါတယ်။ ဖန်စတာဟာ နိုင်ငံတော် အကြည်ညိုပျက်စေမှုနဲ့ ဆက်လက်တရားရင်ဆိုင်ရဖွယ် ရှိနေတဲ့အချိန် အခုလို လွတ်မြောက်လာတာ ဖြစ်ပါတယ်။

*********************************************************
END / 251