ကိုဗစ်မျိုးကွဲသစ် Omicron ကို ကမ္ဘာ့နိုင်ငံပေါင်း ၉ နိုင်ငံတွင် တွေ့လာ

အဲဟ်လေ့ဘိုက်(သ) (အလိုင်ဟေမွစ်စလာမ်) သတင်းဌာန ၊ အဗ်နာ


တောင်အာဖရိကနိုင်ငံမှာ ပထမဆုံးတွေ့ရှိခဲ့တဲ့ ကိုဗစ်မျိုးကွဲသစ် Omicron ကူးစက်သူ ၂ ဦး တွေ့ရှိတယ်လို့ ဩစတေးလျနိုင်ငံက ဒီကနေ့မှာ ထုတ်ပြန်ခဲ့ပြီး မျိုးကွဲသစ်ပြန့်နှံ့တဲ့နိုင်ငံ စုစုပေါင်း ၉ ခုအထိ ရှိလာပြီ ဖြစ်ပါတယ်။

တောင်အာဖရိကကနေ ဆစ်ဒနီကိုရောက်ရှိလာတဲ့ ခရီးသည် ၂ ဦးမှာ တွေ့ရှိခဲ့တာဖြစ်ပြီး အဲဒီသူတွေဟာ ကာကွယ်ဆေးထိုးထားပြီးဖြစ်သလို၊ ရောဂါလက္ခဏာလည်း မပြဘူးလို့ ဩစတေးလျအာဏာပိုင်တွေက ပြောပါတယ်။ လက်ရှိမှာ သူတို့ကို ကွာရန်တိန်း ထားရှိပါတယ်။

နောက်ထပ် တောင်အာဖရိကခရီးသွား ၁၂ ဦးကို ကွာရန်တိန်းထားပြီး သူတို့နဲ့ဆက်နွယ်နေတဲ့ ခရီးသွားနဲ့ လေယာဉ်အမှုထမ်း ၂၆၀ ကိုတော့ ရောက်ရှိတဲ့အရပ်မှာ သီးခြားနေထိုင်ဖို့ အာဏာပိုင်တွေက ညွှန်ကြားထားပါတယ်။

ကိုဗစ်မျိုးကွဲသစ် Omicron ကို တောင်အာဖရိကမှာ အခုတစ်ပတ်အစောပိုင်းက တွေ့ရှိခဲ့တာဖြစ်ပြီး လက်ရှိအချိန်အထိ ဗြိတိန်၊ ဂျာမနီ၊ အီတလီ၊ ဘယ်ဂျီယံ၊ ဘော့စ်ဝါနာ၊ အစ္စရေးနဲ့ ဟောင်ကောင်တို့မှာလည်း ကူးစက်သူတွေကို တွေ့ရှိထားပါတယ်။

မျိုးကွဲသစ်လို့ သံသယဖြစ်စရာကူးစက်မှုကို စုံစမ်းစစ်ဆေးနေကြောင်း ဩစတြီးယားနိုင်ငံက ထုတ်ပြန်ထားပြီး၊ ပြင်သစ်ကျန်းမာရေးဝန်ကြီးက မျိုးကွဲသစ် နိုင်ငံအတွင်းမှာ ပြန့်နှံ့နေပြီလို့ ယုံကြည်ရကြောင်း ဒီကနေ့မှာ ပြောကြားခဲ့ပါတယ်။

Omicron ဟာ အရင်ကပေါ်ထွက်ခဲ့တဲ့ ကိုဗစ်ပိုးတွေထက် ပိုမိုကူးစက်ပြန့်နှံ့လွယ်နိုင်ပြီး၊ ကာကွယ်ဆေးမတိုးတာမျိုး ဖြစ်မှာကို ပညာရှင်တွေက စိုးရိမ်နေကြပါတယ်။ ဒါပေမယ့် ဒီမျိုးကွဲသစ်နဲ့ ပတ်သက်တဲ့ အသေးစိတ်အချက်အလက်တွေကို နောက်သီတင်းပတ်အနည်းငယ်လောက်မှာ သိရှိနိုင်မှာ ဖြစ်ပါတယ်။

ကမ္ဘာ့နိုင်ငံတွေကတော့ မျိုးကွဲသစ် မကူးစက်နိုင်ရေးအတွက် ခရီးသွားလာခွင့်ပိတ်ပင်တာ၊ ကိုဗစ်ကန့်သတ်ချက် ပြန်လည်တိုးမြှင့်တာတွေ လုပ်ဆောင်လာပါတယ်။


*********************************************************************
END / 251