အိန္ဒိယတောင်ပိုင်းတွင် မွတ်စလင်များကို ဒုက္ခပေးရေးလှုပ်ရှားမှု အရှိန်မြင့်

 
အဲဟ်လေ့ဘိုက်(သ) (အလိုင်ဟေမွစ်စလာမ်) သတင်းဌာန ၊ အဗ်နာ



အိန္ဒိယနိုင်ငံတောင်ပိုင်း ကနာတာကာ ပြည်နယ်မှာ မွတ်စလင်တွေအပေါ် ဖိနှိပ်ဒုက္ခပေးရေး ကမ်ပိန်းတွေကို ဟိန္ဒူ ဘာသာရေးအဖွဲ့အစည်းတွေက တိုးမြှင့် လုပ်ဆောင်လာပါတယ်။

စာသင်ကျောင်းတွေမှာ မွတ်စလင်အမျိုးသမီးတွေ ပုဝါဆောင်းမှုကို ပိတ်ပင်တဲ့ ပြီးခဲ့တဲ့နှစ် ဒီဇင်ဘာက စတင်ခဲ့တဲ့ ဒီလုပ်ရှားမှုတွေဟာ အခုအချိန်မှာတော့ ဟာလာလ် အစားအသောက် ပိတ်ပင်ရေး၊ ဗလီတွေမှာ စပီကာနဲ့ ၀တ်ပြုဖို့ နှိုးဆော်မှုကို ပိတ်ပင်ရေး၊ အသီးအနှံ စီးပွားရေးမှာ မွတ်စလင်လုပ်ငန်းရှင်တွေကို ဖယ်ရှားရေးအထိ ကျယ်ပြန့်လာပါတယ်။

ထင်ရှားတဲ့ ဟိန္ဒူဘာသရေးခေါင်းဆောင် ဆစ်ဒါလင်ဂါ ဆွာမီဂျီးက မွတ်စလင်တွေဟာ ပြည်နယ်အတွင်းက သရက်သီးဈေးကွက်ကို လွှမ်းမိုး ချုပ်ကိုင်ထားတယ်လို့ စွပ်စွဲခဲ့ပြီး ဟိန္ဒူတွေအနေနဲ့ ဘာသာတူလုပ်ငန်းရှင်တွေကိုသာ အားပေးဖို့ တိုက်တွန်းခဲ့ပါတယ်။

လက်ယာစွန်းရောက် ဟိန္ဒူဘာသာရေးအဖွဲ့ Hindu Janajagruti Samiti က တာဝန်ရှိသူ ချန်ဒရူး မိုဂါက မွတ်စလင်တွေဟာ ‘တံတွေးထွေး ဂျီဟတ်’ ဆင်နွှဲနေတယ်လို့ စွပ်စွဲခဲ့ပါတယ်။

“အသီးအနှံလုပ်ငန်းကို မွတ်စလင်တွေက လက်ဝါးကြီး အုပ်ထားတယ်။ သူတို့ရောင်းတဲ့ ပေါင်မုန့်တွေ၊ အသီးတွေမှာ တံတွေးထွေးပြီးမှ ရောင်းတာကိုလည်း ကျွန်တော်တို့ တွေ့ရပါတယ်။ မွတ်စလင်တွေ လက်ဝါးကြီးအုပ်ထားတာကို ရပ်တန့်ရေး ကူညီဖို့၊ ဟိန္ဒူဈေးသည်တွေရာင်းတဲ့ သစ်သီးတွေကိုသာ ၀ယ်ယူဖို့ ဟိန္ဒူတွေကို ကျွန်တော် တိုက်တွန်းပါတယ်”

နောက်ထပ် ဟိန္ဒူဘာသာရေးခေါင်းဆောင်တစ်ဦးဖြစ်တဲ့ ပရာရှနက်သ် ဆမ်ဘာဂီကလည်း ဟိန္ဒူလယ်သမားတွေရဲ့လုပ်အားကို မွတ်စလင်လုပ်ငန်းရှင်တွေက ခေါင်းပုံဖြတ်နေတယ်လို့ ပြောကြားခဲ့ပါတယ်။

ကာနာတာကာပြည်နယ်ကို အုပ်စိုးနေတဲ့ အာဏာရ ဟိန္ဒူအမျိုးသားရေးပါတီ BJP အဖွဲ့ဝင်တစ်ချို့နဲ့ ဟိန္ဒူလက်ယာစွန်းရောက်တွေဟာ ပြည်နယ်အတွင်းက ဟာလာလ် အသားလုပ်ငန်းကို သပိတ်မှောက်ဖို့ ပြီးခဲ့တဲ့သီတင်းပတ်ကစတင်ပြီး တိုက်တွန်းဆော်သြလာခဲ့ပါတယ်။

မွတ်စလင်တွေ ၀တ်ပြုဖို့ နှိုးဆော်တဲ့အခါမှာ လော်စပီကာအသုံးပြုမှုကို တားဆီးပိတ်ပင်ဖို့လည်း ဟိန္ဒူအဖွဲ့အစည်းတွေက ပြီးခဲ့တဲ့ရက်ပိုင်းမှာ ဆန္ဒထုတ်ဖော်မှုတွေ လုပ်ဆောင်ခဲ့ကြပါတယ်။

****************************************************************
END / 251