မွတ်စလင် အမျိုးသမီးများကို လေလံတင်သည့် App အတွက် လူ ၃ ဦးကို အိန္ဒိယဖမ်းဆီး

အဲဟ်လေ့ဘိုက်(သ) (အလိုင်ဟေမွစ်စလာမ်) သတင်းဌာန ၊ အဗ်နာ


မွတ်စလင်အမျိုးသမီးတွေကို လေလံတင်ရောင်းချတယ်ဆိုတဲ့ အက်ပလီကေးရှင်းနဲ့ ပတ်သက်ဆက်နွယ်နေတဲ့ သံသယရှိသူ ၃ ဦးကို ဖမ်းဆီးထားတယ်လို့ အိန္ဒိယရဲတပ်ဖွဲ့က ထုတ်ပြန်ပါတယ်။

Bulli Bai လို့အမည်ပေးထားတဲ့ အဲဒီ အက်ပလီကေးရှင်းဟာ ပြီးခဲ့တဲ့သီတင်းပတ်အတွင်းက GitHub မှာပေါ်ထွက်လာတာဖြစ်ပြီး အိန္ဒိယနိုင်ငံတစ်ဝှမ်းက ထင်ရှားတဲ့ မွတ်စလင်အမျိုးသမီး စုစုပေါင်း ၁၀၀ ကျော်လောက်ရဲ့ ဓာတ်ပုံတွေတင်ကာ လေလံတင်ရောင်းချတယ်ဆိုတဲ့ သဘောမျိုး ဖန်တီးထားတာပါ။

ဒါဟာ နိုင်ငံတစ်ဝှမ်း မြင့်တက်လာတဲ့ မွတ်စလင်စော်ကားရေး ပုံစံတွေထဲက တစ်ခုလည်း ဖြစ်ပါတယ်။ Bulli Bai စကားလုံးဟာ မွတ်စလင်အမျိုးသမီးတွေကို နှိမ့်ချသုံးနှုန်းတဲ့ အခေါ်အဝေါ်ပါ။

မွမ်ဘိုင်းရဲတပ်ဖွဲ့ရဲ့ ဆိုက်ဘာဌာနက နိုင်ငံမြောက်ပိုင်း အူတာရက်ဟန်ပြည်နယ်က အသက် ၂၁ နှစ်အရွယ် မာယန့် ရာဝါလ်ဆိုသူကို ဗုဒ္ဓဟူးနေ့မနက်မှာ ဖမ်းဆီးခဲ့ပါတယ်။ Bulli Bai အက်ပလီကေးရှင်းကိစ္စမှာ အဓိကပါဝင်သူလို့ ယူဆရတဲ့ အသက် ၂၁ နှစ်အရွယ် အင်ဂျင်နီယာကျောင်းသား ဗီရှယ် ကူးမားနဲ့၊ အသက် ၁၉ နှစ်အရွယ် မိန်းကလေး ရှဝီတာဆင်းတို့ကိုလည်း ရဲတပ်ဖွဲ့က ဖမ်းဆီးထားပါတယ်။

အက်ပလီကေးရှင်းမှာ ထည့်သွင်းခြင်းခံထားရတဲ့ ဒေလီအခြေစိုက် ဂျာနလစ် အစ္စမတ် အေရာက ဒီ အက်ပလီကေးရှင်းဟာ မွတ်စလင်အမျိုးသမီးတွေကို အရှက်ရစေဖို့ ရည်ရွယ်လုပ်ဆောင်တာဖြစ်တယ်လို့ ပြောပါတယ်။

Bulli Bai အက်ပလီကေးရှင်း တင်ခဲ့တဲ့ အသုံးပြုသူတွေကို သူတို့ပလက်ဖောင်းကနေ ဖယ်ရှားလိုက်ကြောင်း GitHub က အတည်ပြုတယ်လို့ အိန္ဒိယ နည်းပညာဆိုင်ရာဝန်ကြီး အက်ရ်ှဝီနီ ဗစ်ရ်ှနော်က ပြောပါတယ်။

လွန်ခဲ့တဲ့ ၆ လကလည်း မွတ်စလင်အမျိုးသမီးတွေကို လေလံတင်ရောင်းချတယ်လို့ဆိုတဲ့ အက်ပလီကေးရှင်းတစ်ခု Sulli Deals ဆိုတဲ့အမည်နဲ့ ထွက်လာခဲ့ပြီး အမျိုးသမီး ၈၀ လောက် ပါဝင်ပါတယ်။ Sulli Deals အက်ပလီကေးရှင်းနဲ့ပတ်သက်ပြီး ရဲတပ်ဖွဲ့က ဖမ်းဆီးတာမျိုး မလုပ်ခဲ့ပါဘူး။
****************************************************************
END / 251