ကွာရန်တင်း ဝင်ရန်မလိုဘဲ ထိုင်းက လာခွင့်ပြု သည့် နိုင်ငံများ စာရင်းတွင် မြန်မာ ပါဝင်

အဲဟ်လေ့ဘိုက်(သ) (အလိုင်ဟေမွစ်စလာမ်) သတင်းဌာန ၊ အဗ်နာ


ကွာရန်တင်းဝင်ဖို့မလိုဘဲ လာရောက်ခွင့်ပေးမယ့် နိုင်ငံပေါင်း ၆၃ နိုင်ငံကို ထိုင်းက ဒီကနေ့ ထုတ်ပြန်ရာမှာ မြန်မာနိုင်ငံ ပါဝင်လာခဲ့ပြီး ခရီးသွားလုပ်ငန်း ပြန်လည်အားကောင်းလာအောင် ထိုင်းအစိုးရရဲ့ ကြိုးပမ်းမှုတစ်ခု ဖြစ်ပါတယ်။

ကိုဗစ်အန္တရာယ် နည်းပါးတယ်လို့ ယူဆတဲ့ နိုင်ငံက လူတွေကို နိုဝင်ဘာ ၁ ရက်နေ့ကစပြီး တိုင်းပြည်အတွင်း ဝင်ရောက်ခွင့်ပေးမယ်လို့ ထိုင်းအစိုးရက အောက်တိုဘာအစောပိုင်းမှာ ကြေငြာခဲ့တာပါ။ ဝင်ခွင့်ပေးမယ့် နိုင်ငံ ၄၅ ခုစာရင်းကို အောက်တိုဘာ ၂၂ ရက်နေ့မှာ ထုတ်ပြန်ခဲ့ပြီး၊ မနေ့က မြန်မာအပါအဝင် နိုင်ငံတစ်ချို့ကို ထပ်ပေါင်းထည့်ကာ စုစုပေါင်း ၆၃ နိုင်ငံ ဖြစ်လာပါတယ်။

ခွင့်ပြုနိုင်ငံတွေက ခရီးသွားတွေဟာ လေကြောင်းနဲ့သာ ဝင်ရောက်ခွင့်ရမှာဖြစ်ပြီး ကာကွယ်ဆေး ၂ ကြိမ်ထိုးထားတဲ့ အသိအမှတ်ပြုလက်မှတ်၊ ကန်ဒေါ်လာ ၅ သောင်းထက်မနည်းတဲ့ အာမခံ ပါရှိရမှာဖြစ်ပါတယ်။ ထိုင်းနိုင်ငံကို ဆိုက်ရောက်ရောက်ချင်းမှာ ကိုဗစ်စစ်ဆေးမှုခံယူရမှာပါ။ ခွင်ပြုနိုင်ငံတွေမှာ အနည်းဆုံး ၂၁ ရက်နေထိုင်ပြီး၊ ကိုဗစ်ကာကွယ်ဆေးထိုးထားမှသာ ကွာရန်တင်းမလိုဘဲ ထိုင်းနိုင်ငံကို ဝင်ခွင့်ရမှာ ဖြစ်ပါတယ်။

မနေ့က ထပ်ပေါင်းထည့်လိုက်တဲ့ နိုင်ငံတွေက ထိုင်ဝမ်၊ မွန်ဂိုလီးယား၊ ဖိလစ်ပိုင်၊ အင်ဒိုနီးရှား၊ ဗီယက်နမ်၊ လာအို၊ မြန်မာ၊ အိန္ဒိယ၊ သီရိလင်္ကာ၊ နီပေါ၊ မော်ဒိုက်၊ ကူဝိတ်၊ အိုမန်၊ ရိုမေးနီးယား၊ ဆလိုဗက်ကီးယား၊ ခရိုအေးရှားနဲ့ လူဇင်ဘတ်နိုင်ငံတွေ ဖြစ်ပါတယ်။

ဝင်ရောက်လာတဲ့ ခရီးသွားတွေဟာ ကိုဗစ်စစ်ဆေးမှု ရလဒ်ကို ချက်ခြင်း ရနိုင်မှာမဟုတ်သေးဘဲ ထိုင်းအစိုးရက အသိအမှတ်ပြုထားတဲ့ ဆေးရုံမှာ တစ်ညစောင့်ရမှာပါ။

ခရီးသွားလုပ်ငန်းဟာ ထိုင်းနိုင်ငံ GDP ရဲ့ ၂၀ ရာခိုင်နှုန်းအထိ ရှိပါတယ်။ အခုလို ခရီးသွားလုပ်ငန်းကို ပြန်ဖွင့်ပေးလိုက်တာဟာ မိမိတို့တိုင်းပြည် ပုံမှန်ပြန်ဖြစ်ရေး အရေးပါတဲ့ ခြေလှမ်းရဲ့ အစသာ ဖြစ်တယ်လို့ ထိုင်းဝန်ကြီးချုပ် ပရာယွတ် ချန်အိုချာက ပြီးခဲ့တဲ့လ မိန့်ခွန်းမှာ ထည့်သွင်းပြောကြားခဲ့ပါတယ်။

ဝင်ခွင်ပြုတဲ့နိုင်ငံတွေကို စီးပွားရေးအကျိုးအမြတ်၊ ကျန်းမာရေးဆိုင်ရာ ဘေးအန္တရာယ်ကင်းစင်နိုင်မှု အချက်အလက်တွေနဲ့ ရွေးချယ်တာဖြစ်တယ်လို့ ထိုင်းအစိုးရက ပြောပါတယ်။ ၂၀၁၉ ခုနှစ်က ထိုင်းနိုင်ငံကို အများဆုံး လာရောက်လည်ပတ်ခဲ့တဲ့ နိုင်ငံ ၂၀ က အများစု ခွင့်ပြုစာရင်းထဲ ပါဝင်လာခဲ့ပါတယ်။

****************************************************************
END / 251