အဲဟ်လေ့ဘိုက်(သ) (အလိုင်ဟေမွစ်စလာမ်) သတင်းဌာန ၊ အဗ်နာ
အသားတင် သစ်တောပြုန်းတီးမှုကို ၂၀၃၀ ပြည့်နှစ်မှာ သုညအထိ လျှော့ချနိုင်ဖို့ ရည်ရွယ်ထားတယ်လို့ သယံဇာတနဲ့သဘာဝပတ်ဝန်းကျင် ထိန်းသိမ်းရေးဝန်ကြီးဌာန ဒုတိယဝန်ကြီး ဒေါက်တာ ရဲမြင့်ဆွေက ပြောပါတယ်။
“မြန်မာနိုင်ငံအနေနဲ့ နိုင်ငံတကာရဲ့ ကူညီပံ့ပိုးမှုတွေကို ရည်မှန်းထားတဲ့အတိုင်း ရမယ်ဆိုရင် ၂၀၃၀ ပြည့်နှစ်မှာ ဒါမှမဟုတ် ဒီထက်ပိုပြီးစောတဲ့ကာလမှာ အသားတင် သစ်တောပြုန်းတီးမှုကို သုညအထိ လျှော့ချဖို့ (သို့မဟုတ်) သစ်တောပြုန်းတီးမှုကို သိသာထင်ရှားစွာ လျှော့ချဖို့ ရည်ရွယ်ထားတယ်” လို့ ဒုတိယဝန်ကြီး ဒေါက်တာရဲမြင့်ဆွေက ပြောပါတယ်။
စက်တင်ဘာ ၁၀ ရက်နေ့ နေပြည်တော် သင်္ဂဟဟိုတယ်မှာ ကျင်းပပြုလုပ်ခဲ့တဲ့ မြန်မာနိုင်ငံ အမျိုးသားအဆင့် REDD+ မဟာဗျူဟာ အတည်ပြု အလုပ်ရုံဆွေးနွေးပွဲမှာ ဒုတိယဝန်ကြီးက ပြောဆိုခဲ့တာပါ။
အခမ်းအနားကိုတော့ ဆက်စပ်ဝန်ကြီးဌာန အသီးသီးက ဌာနဆိုင်ရာ အကြီးကဲတွေ၊ တိုင်းဒေသကြီးနဲ့ ပြည်နယ်တွေက ကိုယ်စားလှယ်တွေ၊ တိုင်းရင်းသားလူမျိုးစု ကိုယ်စားလှယ်တွေ၊ ကုလသမဂ္ဂ ပတ်ဝန်းကျင်အစီစဉ် (UN Environment) နဲ့UNREDD Programme က တာဝန်ရှိသူတွေ တက်ရောက်ခဲ့ကြပါတယ်။
လက်ရှိ ရာသီဥတု ပြောင်းလဲမှုဖြစ်စဉ်တွေဟာ ကမ္ဘာတဝန်းမှာ ဖြစ်ပေါ်နေသလို မြန်မာနိုင်ငံမှာလည်း ရာသီဥတု ပြောင်းလဲမှု အကျိူးဆက်ကို ခံစားနေကြရတာဖြစ်ပြီး မြန်မာနိုင်ငံဟာ လွန်ခဲ့တဲ့ ဆယ်နှစ်နဲ့ နှိုင်းယှဉ်ကြည့်ရင် အပူချိန်တွေ သိသိသာသာ တိုးလာတယ်လို့ ဆိုပါတယ်။
“မြန်မာနိုင်ငံအနေနဲ့ ရာသီဥတု ပြောင်းလဲမှု လျှော့ချရေးအတွက် အထိရောက်ဆုံး ဆောင်ရွက်နိုင်တဲ့ နည်းလမ်းကတော့ မြန်မာ့သစ်တောတွေကနေ မှန်လုံအိမ်ဓာတ်ငွေ့ ထုတ်လွှတ်မှုတွေကို လျှော့ချခြင်း ဖြစ်တယ်” လို့ ဒုတိယဝန်ကြီးက ပြောပါတယ်။
မြန်မာနိုင်ငံရဲ့ မှန်လုံအိမ်ဓာတ်ငွေ့ ထုတ်လွှတ်မှုကို ကြည့်မယ်ဆိုရင် မြန်မာနိုင်ငံကနေ ထုတ်လွှတ်တဲ့ မှန်လုံအိမ်ဓာတ်ငွေ့ အားလုံးရဲ့ ၈၀ ရာခိုင်နှုန်းခန့်ဟာ သစ်တောတွေကနေ ထုတ်လွှတ်နေတာလို့ သိရပါတယ်။
မြန်မာနိုင်ငံဟာ ကာလရှည်ကြာ သစ်တောတွေ၊ သစ်တောစီမံအုပ်ချုပ် လုပ်ကိုင်မှုတွေမှာ ယုံကြည်မှု ကင်းမဲ့ခဲ့တာတွေ၊ နားလည်မှု လွဲတာတွေ၊ ရည်ရွယ်ချက်ချင်း၊ ချဉ်းကပ်ပုံချင်း ကွာခြားမှုတွေ ရှိခဲ့တဲ့အတွက် စိတ်နေသဘောထားတွေကို နေ့ချင်းညချင်း ပြောင်းလဲနိုင်မှာ မဟုတ်ဘူးလို့လည်း ဆိုပါတယ်။
မြန်မာနိုင်ငံ အမျိုးသားအဆင့် REDD+ မဟာဗျူဟာနဲ့အတူ အရေးပါတဲ့ လူမှုရေးနဲ့ ပတ်ဝန်းကျင်ဆိုင်ရာ ကာကွယ်စောင့်ရှောက်မှု သတင်းစနစ်တခု ထူထောင်သွားမှာဖြစ်ပြီး ဒီစနစ် ရေးဆွဲရေးလုပ်ငန်းက အတော်ခရီးရောက်နေပြီလို့ သိရပါတယ်။
====================================
END / 251
