တာလီဘန်က ယာယီ အာဖဂန် အစိုးရအဖွဲ့ကို ထုတ်ပြန် ကြေငြာ

အဲဟ်လေ့ဘိုက်(သ) (အလိုင်ဟေမွစ်စလာမ်) သတင်းဌာန ၊ အဗ်နာ


ဩဂုတ်လ အလယ်ပိုင်းလောက်ကတည်းက အာဖဂန်နစ္စတန်ကို သိမ်းပိုက်ထားတဲ့ တာလီဘန်ဟာ မနေ့က အစိုးရအဖွဲ့ကို ပထမဆုံး ထုတ်ပြန်ကြေငြာလိုက်ပါတယ်။

အစိုးရအဖွဲ့ကို မူလာ မိုဟာမက် ဟာဆန် အခွန်က ဝန်ကြီးချုပ်အဖြစ် ဦးဆောင်မှာဖြစ်ပါတယ်။ အခွန်ဟာ တာလီဘန်အဖွဲ့ကို တည်ထောင်သူ မူလာအိုမာရ်ရဲ့ အနီးကပ်အကြံပေးဖြစ်ပါတယ်။

အခုထုတ်ပြန်လိုက်တဲ့ အစိုးရအဖွဲ့ထဲမှာ တာလီဘန်ခေါင်းဆောင်တွေသာ ရာထူးယူထားပြီး တစ်ခြားနိုင်ငံရေးအဖွဲ့အစည်းတွေက ခေါင်းဆောင်တွေ၊ လူမျိုးစုကိုယ်စားလှယ်တွေ မပါဝင်ပါဘူး။

တာလီဘန်ရဲ့ နိုင်ငံရေးအကြီးအကဲဖြစ်ပြီး အမေရိကန်နဲ့ ညှိနှိုင်းတဲ့အဖွဲ့ကို ဦးဆောင်တဲ့ အဘ်ဒူ ဂနီ ဘရာဒါက ဒုတိယဝန်ကြီးချုပ်အဖြစ် တာဝန်ယူမှာပါ။

တာလီဘန်ရဲ့ မဟာမိတ်အဖွဲ့ ဟက်ကာနီကွန်ယက်ကို တည်ထောင်သူရဲ့သား ဆီရာဂျူဒင် ဟက်ကာနီက ပြည်ထဲရေးဝန်ကြီးဖြစ်ပါတယ်။ ကာကွယ်ရေးဝန်ကြီးနေရာကို မူလာအိုမာရ်ရဲ့သား မူလာ မိုဟာမက် ယာကွဘ်က ရယူထားပါတယ်။

တာလီဘန်ပြောရေးဆိုခွင့်ရှိသူ ဇဘီဟွတ်လာ မူဂျာဟစ်က ​အာဖဂန်နစ္စတန်ဟာ အစ္စလာမ့်မစ်အီမရိတ်နိုင်ငံဖြစ်ပြီး၊ တိုင်းပြည်ကို ရှရီအာ ဥပဒေအတိုင်း အုပ်ချုပ်သွားမယ်လို့ မနေ့က သတင်းစာရှင်းလင်းပွဲမှာ ပြောကြားခဲ့ပါတယ်။

အခုအစိုးရအဖွဲ့ဟာ ယာယီအစိုးရအဖွဲ့ဖြစ်တယ်လို့ မူဂျာဟစ်ကဆိုပြီး သက်တမ်းဘယ်လောက်ရှိမလဲ၊ ရွေးကောက်ပွဲလုပ်ပြီး အမြဲတမ်းအစိုးရအဖွဲ့ ပြန်ဖွဲ့မှာလားဆိုတာတွေကို အသေးစိတ် မပြောခဲ့ပါဘူး။

တာလီဘန်က အခုထုတ်ပြန်လိုက်တဲ့ အာဖဂန်အစိုးရတစ်ဖွဲ့လုံးကို တာလီဘန် ဘာသာရေးခေါင်းဆောင် အဓိပတိ ဟိုက်ဘာသူလာ အခွန်ဇာဒါက ထိန်းချုပ်မှာဖြစ်ပြီး၊ သူ့ရဲ့အမိန့်ကိုသာ နာခံရမှာ ဖြစ်ပါတယ်။
ဟာဆန် အခွန်က ဘယ်သူလဲ

တာလီဘန်အစိုးရအဖွဲ့ကို ဦးဆောင်မယ့် မူလာ မိုဟာမက် ဟာဆန် အခွန်ဟာ တာလီဘန်ရဲ့ အမြင့်ဆုံးအာဏာပိုင်အဖွဲ့ဖြစ်တဲ့ Rehbari ရှူရာကောင်စီ အကြီးအကဲ ဖြစ်ပါတယ်။

၁၉၉၆ ခုနှစ်ကနေ ၂၀၀၁ ခုနှစ် တာလီဘန်တွေ အာဖဂန်နစ္စတန်ကို အုပ်စိုးစဉ်မှာ ဟာဆန် အခွန်ဟာ နိုင်ငံခြားရေးဝန်ကြီးနဲ့ ဒုတိယဝန်ကြီးချုပ်တာဝန်တွေကို ထမ်းဆောင်ခဲ့ပါတယ်။

ဟာဆန်အခွန်ဟာ တာလီဘန်ကိုတည်ထောင်သူ မူလာအိုမာရ်နဲ့ အနီးကပ်ရှိခဲ့သူဖြစ်ပြီး လက်ထောက် လူယုံတစ်ဦးလည်းဖြစ်ပါတယ်။ တာလီဘန် ပေါ်ပေါက်လာရာ ကန်ဒါဟာဒေသသားပါ။

အဖွဲ့အတွင်းမှာ ဩဇာကြီးသလို၊ လေးစားခံရပြီး အဓိပတိ ဟိုက်ဘာသူလာရဲ့ ယုံကြည်မှုကို ရရှိထားသူလည်း ဖြစ်ပါတယ်။

ဟာဆန်အခွန်ဟာ အသက် ၆၀ ကျော်အရွယ်ရှိပြီး ဘာသာရေးထက် နိုင်ငံရေးဖက် ပိုယိမ်းကာ စစ်ရေးဆိုင်ရာကိစ္စတွေကို ပိုမိုကိုင်တွယ်လိမ့်မယ်လို့ ကျွမ်းကျင်သူတွေက သုံးသပ်ပါတယ်။

ခေတ်သစ် အာဖဂန်နစ္စတန်ကို တည်ထောင်သူ အဟ်မဒ်ရှား ဒူရာနီရဲ့မျိုးဆက်က ဆင်းသက်လာတာဖြစ်ပြီး အာဖဂန်ရဲ့ လူများစု ပက်ရ်ှသွန်လူမျိုးဖြစ်ပါတယ်။
****************************************************************

END / 251