ရေနံနှင့်ဓာတ်ငွေ့လုပ်ငန်းကို ဥရောပ၏ပိတ်ဆို့မှု မဖြုံဟု စစ်ကောင်စီပြော

အဲဟ်လေ့ဘိုက်(သ) (အလိုင်ဟေမွစ်စလာမ်) သတင်းဌာန ၊ အဗ်နာ


ပိတ်ဆို့အရေးယူခံရတဲ့ စာရင်းထဲမှာ စစ်ကောင်စီဝန်ကြီးတွေနဲ့ မြန်မာစစ်တပ် ထိပ်တန်းအရာရှိ စုစုပေါင်း ၂၂ ဦး၊ စစ်တပ်ကို အဓိက ထောက်ပံ့ပေးနေတဲ့ လုပ်ငန်း ၄ ခု တို့ ပါဝင်ပါတယ်။

မြန်မာနိုင်ငံရဲ့ နိုင်ငံခြားဝင်ငွေ ၅၀ ရာခိုင်နှုန်းလောက်ဟာ သဘာဝဓာတ်ငွေ့ရောင်းချမှုကနေ ရရှိတာဖြစ်ပြီး ၂၀၂၁-၂၀၂၂ ခုနှစ်အတွင်း မြန်မာ့ရေနံနဲ့ သဘာဝဓာတ်ငွေ့လုပ်ငန်းက နိုင်ငံခြားဝင်ငွေ ကန်ဒေါ်လာ ၁.၅ ဘီလီယံလောက် ရရှိလိမ့်မယ်လို့ ခန့်မှန်းထားပါတယ်။

MOGE ဟာ မြန်မာနိုင်ငံက ရေနံနဲ့ သဘာဝဓာတ်ငွေ့ လုပ်ကွက်တွေကို ထိန်းချုပ်ကာ ပြည်တွင်း၊ ပြည်ပ ကုမ္ပဏီတွေနဲ့ ဆက်လက်လုပ်ကိုင်တာ၊ လုပ်ကွက်ချပေးပြီး အခွန်ကောက်တာတွေကို လုပ်ဆောင်ပါတယ်။

“စစ်တပ်က ထိန်းချုပ်ထားပြီး အကျိုးအမြတ် ရယူနေတဲ့အတွက် MOGE ဟာ မြန်မာနိုင်ငံမှာ ဒီမိုကရေစီနဲ့ တရားဥပဒေ စိုးမိုးမှု ပျက်ဆီးအောင် လုပ်ဆောင်နေတဲ့ စစ်တပ်ကို ကူညီပံ့ပိုးပေးသလို ဖြစ်နေပါတယ်” လို့ ဥရောပသမဂ္ဂက ထုတ်ပြန်တဲ့ ကြေငြာချက်မှာ ဖော်ပြထားပါတယ်။

အာဏာသိမ်းစစ်ကောင်စီ ပြောခွင့်ရ ဗိုလ်မှူးချုပ် ဇော်မင်းထွန်းက ဒီလိုပိတ်ဆို့မှုဟာ လုပ်ငန်းအပေါ် ထိရောက်မှုရှိမှာမဟုတ်ဘဲ အရင်ကလည်း ပိတ်ဆို့မှုတွေကြားထဲက ရှင်သန်အောင် လုပ်ဆောင်ခဲ့တယ်လို့ တုန့်ပြန်ပြောဆိုခဲ့ပါတယ်။

စစ်ကောင်စီ အဓိက၀င်ငွေရနေတဲ့ လုပ်ငန်းတွေမှာ ရင်းနှီးမြှုပ်နှံထားတာတွေ ရုပ်သိမ်းဖို့ နိုင်ငံတကာ လူ့အခွင့်အရေးအဖွဲ့တွေက တိုက်တွန်းဆော်သြခဲ့ပြီးတဲ့နောက် အမေရိကန်၊ ပြင်သစ်၊ ဂျပန်နဲ့ မလေးရှားတို့က ထိပ်တန်း ကုမ္ပဏီ ၄ ခုလောက်ဟာ မြန်မာနိုင်ငံက ကမ်းလွန်သဘာဝဓာတ်ငွေ့လုပ်ငန်း ၂ ခုကနေ နှုတ်ထွက်တော့မှာဖြစ်ကြောင်း ပြီးခဲ့တဲ့ သီတင်းပတ်တွေမှာ ကြေငြာခဲ့ပါတယ်။

ဗိုလ်မှူးချုပ် ဇော်မင်းထွန်းက ထွက်သွားတဲ့ကုမ္ပဏီတွေနေရာမှာ အစားဝင်လာမယ့် နိုင်ငံခြားကုမ္ပဏီတွေ အဆင်သင့်ရှိနေပြီး အမည်တွေကို ထုတ်မပြောလိုဘူးလို့ ပြောကြားခဲ့ပါတယ်။

****************************************************************
END / 251