တရုတ်အစိုးရဟာ နိုင်ငံအနောက်ပိုင်း ရှင်ကျန်းပြည်နယ်မှာ ဝီဂါလူမျိုးတွေရဲ့ ဗလီဝတ်ကျောင်းတော်တွေကို ဖြိုဖျက်ကာ အများသုံးအိမ်သာတွေ ဆောက်လုပ်နေပြီး ဒါဟာ လူမျိုးစုရဲ့သမိုင်းကို ဖျောက်ဖျက်တာသာမက စော်ကားတာမျိုး ဖြစ်တယ်လို့ ဝေဖန်မှုတွေ ရှိလာပါတယ်။
ရှင်ကျန်း အာဏာပိုင်တွေအနေနဲ့ ဝီဂါမွတ်စလင်တွေရဲ့ ၀တ်ပြုရာနေရာတွေကို ဖြိုချ ဖျက်ဆီးဖို့အတွက် တရုတ်အစိုးရက ၂၀၁၆ ခုနှစ်မှာ ညွှန်ကြားချက် ထုတ်ပြန်ခဲ့တာပါ။
အခုအချိန်မှာတော့ ဖျက်ဆီးခံထားရတဲ့ ဗလီနေရာတွေမှာ အာဏာပိုင်တွေက အများသုံးအိမ်သာတွေ ဆောက်လုပ်လာပါတယ်။
ရှင်ကျန်းပြည်နယ် အာတူရ်ှမြို့ ဆွန်တာ့ဂ်ရွာက ‘တိုကူလ်’ ဗလီဟာ ၂၀၁၈ ခုနှစ်မှာ ဖြိုချ ဖျက်ဆီးခံခဲ့ရပြီး လက်ရှိ ဗလီနေရာမှာ အများသုံး အိမ်သာတွေ ဆောက်လုပ်ထားပါတယ်။
ကျေးရွာတာဝန်ရှိသူတွေက ရွာကအိမ်တိုင်းမှာ အိမ်သာတွေရှိကြပြီး ဒေသဟာ ကမ္ဘာလှည့်ခရီးသွားနေရာလည်း မဟုတ်တာကြောင့် အများသုံးအိမ်သာတွေ မလိုအပ်ကြောင်း၊ ဒါဟာ ဗလီဖြိုချမှုကို ဖုံးကွယ်ဖို့ဖြစ်ပြီး ၀ီဂါတွေကို စော်ကားတာဖြစ်ကြောင်း ပြောကြားခဲ့ပါတယ်။
ဆွန်တာ့ဂ်ရွာက အခြား အဖျက်ဆီးခံ ‘အဇ်နာ’ ဗလီ နေရာမှာလည်း အာဏာပိုင်တွေက အရက်ဆိုင်ဖွင့်ထားပါတယ်။ ဟိုတန်မြို့က ဖျက်ဆီးခံ ဗလီနေရာမှာ အတွင်းခံစက်ရုံ တည်ဆောက်ထားပါတယ်။
တရုတ်အစိုးရဟာ ပြီးခဲ့တဲ့ ၃ နှစ်အတွင်း ရှင်ကျန်းပြည်နယ်က ဗလီဝတ်ကျောင်းတော်ပေါင်း တစ်သောင်းကနေ တစ်သောင်းခွဲအထိ ဖြိုချဖျက်ဆီးခဲ့တယ်လို့ ဝီဂါလူ့အခွင့်အရေး စောင့်ကြည့်အဖွဲ့က ပြောပါတယ်။
ရှင်ကျန်းပြည်နယ်က ၀ီဂါနဲ့ အခြား လူမျိုးစုငယ်တွေကို တရုတ်အစိုးရက ဖိနှိပ်ညှင်းပမ်းမှုတွေ လုပ်ဆောင်နေတယ်လို့ ကမ္ဘာ့မီဒီယာတွေက ပြီးခဲ့တဲ့နှစ်မှာ ကျယ်ကျယ်ပြန့်ပြန့် ဖော်ထုတ် တင်ပြခဲ့ကြပါတယ်။ သန်းနဲ့ချီတဲ့ ၀ီဂါတွေကိုလည်း တရုတ်အစိုးရက အကျဉ်းစခန်းတွေမှာ ထိန်းသိမ်းထားပါတယ်။
တရုတ် ကွန်မြူနစ်အစိုးရက ဒီသတင်းတွေကို ငြင်းဆိုပါတယ်။
************************************
END / 251
