အထူး ကိုယ်စားလှယ် မြန်မာနိုင်ငံသွားနိုင်ရေး အာဆီယံ က စစ်ကောင်စီကို ဆက်လက် ဖိအားပေးမည်

အဲဟ်လေ့ဘိုက်(သ) (အလိုင်ဟေမွစ်စလာမ်) သတင်းဌာန ၊ အဗ်နာ

အာဆီယံအထူးကိုယ်စားလှယ် မြန်မာနိုင်ငံကိုသွားကာ နိုင်ငံရေးနယ်ပယ်က သက်ဆိုင်သူတွေနဲ့ တွေ့ဆုံညှိုင်းအဖြေရှာနိုင်ရေး အာဏာသိမ်းစစ်ကောင်စီကို ဆက်လက်ဖိအားပေးသွားဖို့ အာဆီယံခေါင်းဆောင်တွေက ဆုံးဖြတ်ထားပါတယ်။

အခုတစ်ပတ်နှောင်းပိုင်းမှာ အာဆီယံထိပ်သီးအစည်းအဝေးကို ကျင်းပမှာပါ။ မြန်မာနိုင်ငံမှာဖြစ်ပေါ်နေတဲ့ ပြဿနာတွေ ဖြေရှင်းနိုင်ရေး အာဆီယံရဲ့ ကြိုးပမ်းဆောင်ရွက်မှုမှာ ပူးပေါင်းပါဝင်မှုမရှိတဲ့အတွက် အာဏာသိမ်းခေါင်းဆောင် ဗိုလ်ချုပ်မှူးကြီးမင်းအောင်လှိုင်ကို အာဆီယံက အစည်းအဝေးတက်ခွင့် မပေးပါဘူး။

အစည်းအဝေးအပြီး အာဆီယံဥက္ကဌက ထုတ်ပြန်မယ့် ကြေငြာချက်မူကြမ်းမှာ ဧပြီလက ရထားတဲ့ သဘောတူညီချက်တွေအတိုင်း မြန်မာနိုင်ငံဆိုင်ရာ အထူးကိုယ်စားလှယ်ကို လက်ခံကာ နိုင်ငံရေး နယ်ပယ်က သက်ဆိုင်သူတွေနဲ့ တွေ့ခွင့်ပေးရေး စစ်ကောင်စီကို ဆက်လက်ဖိအားပေးသွားမယ်လို့ ဖော်ပြထားပါတယ်။

ဒီကြေငြာချက်မူကြမ်းကို Kyodo သတင်းဌာနက ရရှိခဲ့တာ ဖြစ်ပါတယ်။

ဘရူနိုင်းနိုင်ငံရဲ့ ဒုတိယနိုင်ငံခြားရေးဝန်ကြီး အရီဝမ်ယူစွဖ်က မြန်မာနိုင်ငံဆိုင်ရာ အာဆီယံ အထူးကိုယ်စားလှယ်အဖြစ် တာဝန်ယူထားပြီး မြန်မာနိုင်ငံကိုလာရောက်ကာ ဒေါ်အောင်ဆန်းစုကြည်အပါအဝင် နိုင်ငံရေးနယ်ပယ်က သက်ဆိုင်သူအားလုံးနဲ့တွေ့နိုင်ရေး တောင်းဆိုထားပေမယ့် အာဏာသိမ်းစစ်ကောင်စီက ခွင့်မပြုပါဘူး။

အာဆီယံဟာ အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်၊ စစ်ကောင်စီနိုင်ငံခြားရေးဝန်ကြီး ဦးဝဏ္ဏမောင်လွင်တို့ကို ထိပ်သီးအစည်းအဝေး တက်ခွင့်မပေးဘဲ၊ နိုင်ငံရေးနယ်ပယ်ကမဟုတ်တဲ့ သူတစ်ဦးကို မြန်မာကိုယ်စားပြု တက်ခွင့်ပေးမှာ ဖြစ်ပါတယ်။

စစ်ကောင်စီဟာ အထူးကိုယ်စားလှယ် အရီဝမ်ယူစွဖ်ကို အဝေးရောက်အစိုးရ NUG နဲ့ မဆက်သွယ်ဖို့ သတိပေးထားသလို၊ မိမိတို့ဟာ အာဆီယံထိပ်သီးအစည်းအဝေးကို တက်ရောက်ခွင့် အပြည့်အ၀ ရှိတယ်လို့လည်း ထုတ်ပြန်ထားပါတယ်။

အရီဝမ်ယူစွဖ်ဟာ ထိပ်သီးအစည်းအဝေးအပြီးမှာလည်း မြန်မာနိုင်ငံကို သွားရောက်နိုင်ရေး စစ်ကောင်စီနဲ့ ဆက်လက်ညှိနှိုင်းဖို့ရှိတယ်လို့ အာဆီယံအဖွဲ့ သတင်းရင်းမြစ်တွေက ပြောပါတယ်။
#############################                       
END / 251