အဲဟ်လေ့ဘိုက်(သ) (အလိုင်ဟေမွစ်စလာမ်) သတင်းဌာန ၊ အဗ်နာ
ပြည်တွင်းလက်နက်ကိုင် သောင်းကျန်းမှုအန္တရာယ်ကို ချေမှုန်းနိုင်ရေးအတွက် ရေတို ရည်မှန်းချက်အရ ပြည်သူ့စစ် အဖွဲ့အစည်းတွေကို ဖွဲ့ထားတာဖြစ်ပြီး နိုင်ငံတော်ရဲ့ ကာကွယ်ရေးမူဝါဒ မပြောင်းမချင်း ဆက်လက်တည်ရှိနေမယ်လို့ ကာကွယ်ရေးဝန်ကြီးဌာနက ပြောပါတယ်။
စက်တင်ဘာ ၁၁ ရက်နေ့ ပြည်သူ့လွှတ်တော်အစည်းအဝေးမှာ မွန်ပြည်နယ်၊ ပေါင်မဲဆန္ဒနယ်က ဒေါ်မိကွန်ချမ်း မေးတဲ့ တိုင်းဒေသကြီးနဲ့ ပြည်နယ်အတွင်းရှိ ကျေးရွာတွေမှာ ပြည်သူ့စစ်တွေကို မည်သည့်အတွက်ကြောင့်ထားရှိပြီး ပြည်သူ့စစ်တွေရဲ့ လုပ်ဆောင်ချက်တွေနဲ့ ပြည်သူ့စစ်အဖွဲ့တွေကို မည်သည့်ဌာနအဖွဲ့အစည်းက တာဝန်ခံသည်ကို သိရှိလိုကြောင်း မေးခွန်းနဲ့ပတ်သက်ပြီး ကာကွယ်ရေးဝန်ကြီးဌာန ဒုတိယဝန်ကြီး ဗိုလ်ချုပ်မြင့်နွယ်က အခုလို ပြန်လည်ဖြေဆိုလိုက်တာပါ။
တပ်မတော်ရဲ့ ကြီးကြပ်ကွပ်ကဲမှုနဲ့ တိုင်းစစ်ဌာနချုပ်နယ်မြေများမှာ ရပ်ကွက်ကျေးရွာ၊ စက်ရုံ၊ အလုပ်ရုံ၊ လုပ်ငန်းခွင် စတဲ့ အချက်အချာကျတဲ့ နေရာတွေမှာ စစ်ရေးလိုအပ်ချက်အရ ပြည်သူ့စစ်ဌာနေအဖွဲ့တွေကို ဖွဲ့စည်းထားရှိတာလို့ ဒုတိယဝန်ကြီးက ပြောပါတယ်။
“တိုင်းစစ်ဌာနချုပ်နယ်မြေတွေမှာ ပြည်သူ့စစ်ဌာနေအဖွဲ့တွေ ဖွဲ့စည်းထားရတာဟာ ပြည်တွင်းလက်နက်ကိုင် သောင်းကျန်းမှုအန္တရာယ်ကို ချေမှုန်းနိုင်ရေးအတွက် ရေတို ရည်မှန်းချက်အရ ဖွဲ့စည်းထားခြင်းဖြစ်ပြီး ရေရှည်မှာ ပြည်သူတရပ်လုံးက မိမိနိုင်ငံကို ကာကွယ်စောင့်ရှောက်တဲ့ ပြည်သူ့စစ်မဟာဗျူဟာအစီအမံရဲ့ အစိတ်အပိုင်းအဖြစ် ပါဝင်ဆောင်ရွက်နိုင်မယ့် ပြည်သူ့စစ်ဌာနေအဖွဲ့တွေအဖြစ် ဖွဲ့စည်းထားရှိခြင်းပဲ ဖြစ်ပါတယ်။ ဖွဲ့စည်းထားတဲ့ ပြည်သူ့စစ်ဌာနေအဖွဲ့အစည်းတွေကို တပ်မတော် ကြည်း၊ ရေ၊ လေ တပ်ရင်းတပ်ဖွဲ့တွေက ဖွဲ့စည်းရေး၊ လေ့ကျင့်ရေး၊ လက်နက်တပ်ဆင်ရေးနဲ့ တာဝန်ခွဲဝေ သတ်မှတ်ပေးရေး အပိုင်းတို့ကို တာဝန်ယူဆောင်ရွက်လျက်ရှိပါတယ်။ သက်ဆိုင်ရာ တိုင်းစစ်ဌာနချုပ်ရုံးတွေက နယ်မြေအလိုက် ဖွဲ့စည်းထားတဲ့ ပြည်သူ့စစ်အဖွဲ့အစည်းတွေကို ကြီးကြပ်ကွပ်ကဲပြီး တနိုင်ငံလုံး အတိုင်းအတာအနေနဲ့ ပြည်သူ့စစ်နှင့် နယ်ခြားတပ်များ ညွှန်ကြားရေးမှုးရုံးက ကြီးကြပ်ကွပ်ကဲလျက်ရှိပါတယ်” လို့ ဗိုလ်ချုပ်မြင့်နွယ်က ဆိုပါတယ်။
မေးခွန်းရှင် ဒေါ်မိကွန်ချမ်းက ငြိမ်းချမ်းတဲ့နယ်မြေတွေမှာ ပြည်သူ့စစ်အဖွဲ့တွေ ဆက်လက်ဖွဲ့စည်းထားရှိဖို့ လိုသလား၊ ဒီအဖွဲ့တွေမှာ ဥပဒေတွေရှိလား၊ ဒီအဖွဲ့တွေရဲ့ တရားဥပဒေမဲ့ လုပ်ရပ်တွေအတွက် ဘယ်လို အရေးယူဆောင်ရွက်လည်းလို့ ဆက်စပ်မေးခွန်းကိုတော့ ဒုတိယဝန်ကြီးက အခုလို ပြန်လည်ဖြေဆိုခဲ့ပါတယ်။
“နိုင်ငံတော်ရဲ့ ကာကွယ်ရေးမူဝါဒဆိုတာ နိုင်ငံတိုင်းမှာရှိပါတယ်။ ရေရှည်ရည်မှန်းချက် အတွက်ဆိုရင် ပြည်သူ့စစ်မဟာဗျုဟာ အကောင်အထည်ဖော်ဖို့ ဖွဲ့စည်းပုံအခြေခံဥပဒေမှာလည်း ပြဆိုထားပါတယ်။ နိုင်ငံတနိုင်ငံရဲ့ ကာကွယ်ရေးမူဝါဒအရ ဆက်လက်ဖွဲ့စည်းထားခြင်းဖြစ်ပါတယ်။ နိုင်ငံတော်ရဲ့ ကာကွယ်ရေးမူဝါဒ ပြောင်းလဲမှုမရှိမခြင်း ဆက်လက်ဆောင်ရွက်မှာ ဖြစ်ပါတယ်။ ပြည်သူ့စစ်တွေဟာ တပ်မတော်သားအဖွဲ့အစည်းမဟုတ်ပါဘူး။ သူတို့ဟာ အရပ်ဘက် အဖွဲ့အစည်းတွေ ဖြစ်ပါတယ်။ သူတို့နဲ့ဆိုင်တဲ့အမှုတွေဟာ ရဲဘက်နဲ့ဆိုင်တဲ့ နယ်ဘက်အမှုပဲ ဖြစ်ပါတယ်။ ပြည်သူ့စစ်နဲ့ပတ်သက်လို့ ကာကွယ်ရေးဝန်ကြီးဌာနအနေနဲ့ ကြီးကြပ်ကွပ်ကဲတယ်၊ ဖွဲ့စည်းတယ်၊ လေ့ကျင့်ပေးတယ်၊ ဖြစ်လာတဲ့ ပြဿနာနဲ့ပတ်သက်လို့တော့ အရပ်သားဖြစ်တဲ့အတွက်ကြောင့် အရပ်ဖက်နယ်ဖက် ဥပဒေနဲ့ပဲ အရေးယူလျက်ရှိပါတယ်” လို့ ပြောပါတယ်။
ပေါင်မြို့နယ် တခုတည်းမှာပဲ ပြည်သူ့စစ်အဖွဲ့ရှိတဲ့ ရွာပေါင်း ၄၅ ရွာ၊ တပ်ဖွဲ့ဝင်ပေါင်း ၁၁၂၆ ဦး၊ လက်နက်ကိုင်ခွင့်ပြုထားတဲ့ ကျေးရွာ ၂၈ ရွာရှိပြီး လက်နက်အရေအတွက်အနေနဲ့ ၂၄၆ လက်၊ ကျည်ဆံ ၇၅၁၃ တောင် ခွင့်ပြုထားတယ်လို့ ဒေါ်မိကွန်ချမ်းက ပြောပါတယ်။
ဒါအပြင် တနိုင်ငံလုံးအနေနဲ့ ပြည်သူ့စစ်အဖွဲ့ပေါင်း ၆၀၅၀ ရှိပြီး တဖွဲ့မှာ အနည်းဆုံး ၂၀ ဦးကနေ ၆၀ ဦး ဖွဲ့စည်းပုံ ခွင့်ပြုထားတယ်လို့လည်း ဆိုပါတယ်။
====================================
END / 251
