ပြည်သူ‌များ နိုင်ငံရေးစိတ်ဝင်စားမှု နည်းလာသဖြင့် ၂၀၂၀ ရွေးကောက်ပွဲအတွက် စိုးရိမ်ရ

အဲဟ်လေ့ဘိုက်(သ) (အလိုင်ဟေမွစ်စလာမ်) သတင်းဌာန ၊ အဗ်နာ


မြန်မာနိုင်ငံအတွင်းရှိ ပြည်သူတွေဟာ နိုင်ငံရေး စိတ်ဝင်စားမှု လျော့နည်းလာတာကြောင့် ၂၀၂၀ ရွေးကောက်ပွဲအတွက် စိုးရိမ်စရာ‌တွေ ဖြစ်လာတယ်လို့ ၂၀၂၀ နိုင်ငံသားများ နိုင်ငံရေးမျှော်မှန်းချက်စစ်တမ်းမှာ‌‌ ‌ဖော်ပြထားပါတယ်။

၂၀၂၀ နိုင်ငံသားများ နိုင်ငံရေးမျှော်မှန်းချက်စဈတမျး ရှင်းလင်းပွဲကို စက်တင်ဘာ ၂၇ ရက် တောင်ကြီးမြို့ ထိန်သာဟိုတယ်မှာ ပြုလုပ်ခဲ့ပါတယ်။

ရွေးကောက်ပွဲဆိုင်ရာ ပြည်သူ့လှုပ်ရှားမှု ပရိုဂရမ်မန်နေဂျာ ကိုဟန်စိုးထွန်းက “လောလောဆယ် နိုင်ငံရေးအပေါ်မှာ စိတ်ဝင်စားမှု အခုလက်ရှိအချိန်မှာ ရှိတဲ့အနေအထားပေါ်မှာ ခန့်မှန်းပြီးတော့မှ ၂၀၂၀ အတွက် ဘာလုပ်မလဲပေါ့။ ဒီကိန်းဂဏန်းတွေဟာ သတိထားရမယ့် အနေအထားမှာ ရှိနေတယ်။ တချို့ကိန်းဂဏန်းတွေ ၂၀၂၀ မှာ တိုးတက်လာမှ နိုင်ငံရေးပါတီတွေ အားလုံးအတွက် အကျိုးရှိလိမ့်မယ်။ အဲဒီသဘောတရားကို ကျနော်တို့က ပြောချင်တာ။ ၂၀၂၀ မှာ ဒီကိန်းဂဏန်းအတိုင်း ရှိမယ်လို့ ပြောတာ မဟုတ်ဘူး။ လက်ရှိအနေအထားကတော့ ၂၀၁၉ မတ်လမှာ ဒီအနေအထား ရှိနေတယ်။ ၂၀၂၀ မှာ ဒီအနေအထားကို ပြောင်းဖို့ ကြိုးစားဖို့ လိုတာပေါ့။ ကိုယ် လိုချင်တဲ့ အနေအထားကို ရောက်ဖို့အတွက် ဘယ်လို‌တွေ လုပ်မလဲဆိုတာ ကျနော်တို့က ပိုပြီးအဓိကထားချင်တာပါ” လို့ ပြောပါတယ်။

ပြည်သူတွေ နိုင်ငံရေး စိတ်ဝင်စားမှုနည်းပြီး ရွေးကောက်ပွဲ အလေးထားမှု နည်းလာခြင်းဟာ သတင်းအချက်အလက် ရရှိမှု အားနည်းတာနဲ့ ဘာသာစကား အခက်အခဲ ရှိတာကြောင့်လို့ နိုင်ငံရေးပါတီတွေက သုံးသပ်လိုက်ပါတယ်။

တောင်ကြီးမြို့နယ် SNLD ပါတီဥက္ကဋ္ဌ နန်းမြဦးက တနိုင်ငံလုံးမှာ မဲပေးတာ နည်းတာဟာ ဖက်ဒရယ်ဒီမိုကရေစီနိုင်ငံတော် ချီတက်တာနဲ့ ရွေးကောက်ပွဲ လုပ်တဲ့နေရာမှာ စိုးရိမ်ရတယ်လို့ ပြောပါတယ်။

“သူတို့ရဲ့စစ်တမ်းအရဆိုရင် ဒီအပေါ်မှာ သူတို့ ယုံကြည်မှုတွေ အားနည်းနေတယ်။ တပိုင်းက နားမလည်ဘူး။ နိုင်ငံသားတယောက် ရှိရမယ့် တာဝန်နဲ့ ဝတ္တရားကို မသိတာ၊ ရွေးကောက်ပွဲရဲ့ သမာသမတ်ရှိမှု၊ အသုံးဝင်မှု၊ ဘာကြောင့် ဒီရွေးကောက်ပွဲ အရေးကြီးတယ်ဆိုတာ ပြည်သူတိုင်းကို မက်ဆေ့ခ်ျမထည့်ပေးနိုင်ဘူးလို့ မြင်ပါတယ်။ သတင်းအချက်အလက်တွေကို လက်လှမ်းမမီတာ တပိုင်းပေါ့။ တိုင်းနဲ့ပြည်နယ် အသီးသီးမှာတောင်မှ ရှမ်းပြည်နယ်ဟာ ပယ်မဲများတယ်ဆိုတဲ့ လက္ခဏာဟာ မကောင်းပါဘူး။ သဘောကတော့ ပြည်သူတွေဟာ မဲပေးခြင်းရဲ့တန်ဖိုးကို မသိဘူး။ မဲကို ဘယ်လိုပေးရမလဲ ဆိုတာ မသိဘူး ဖြစ်နေတာပေါ့။ ဒါဟာ ပါတီအတွက်၊ ရွေးကောက်ပွဲအတွက် အင်မတန် အန္တရာယ်များပါတယ်။ စိန်ခေါ်မှုတရပ်လည်း ဖြစ်ပါတယ်။ Civic Education တွေ အများကြီး လုပ်ရမယ်။ သတင်းမီဒီယာရဲ့ ဖော်ပြမှုတွေလည်း အများကြီး လိုအပ်တယ်။ ဖော်ပြတဲ့နေရာမှာ ဘာသာစကား အခက်အခဲလည်း ရှိမယ်လို့ မြင်ပါတယ်။ တချို့ တိုင်းရင်းသား လူမျိုးပေါင်း မြောက်မြားစွာက သူတို့ ကျွမ်းကျင်တဲ့ ဘာသာစကား မဟုတ်တဲ့၊ ရုပ်သံ အသံလွှင့်တာကအစ ပန်းဖလက် ကြေညာတာ အဆုံး ကိုယ့်ဘာသာစကား မဟုတ်ဘူးဆိုရင် သူတို့က နားလည်ရ ခက်ပါတယ်။ အဲဒီအတွက် မီဒီယာကိုလည်း အားကိုးပါတယ်”လို့ ပြောပါတယ်။

ဒါ့အပြင် စစ်တမ်းအရ ရှမ်းပြည်နယ်မှာ တိုင်းရင်းသားတွေများတဲ့အတွက် ပယ်မဲ အများဆုံး တွေ့ရှိထားတာ ဖြစ်ပါတယ်။

၂၀၂၀ နိုင်ငံသားများ နိုင်ငံရေးမျော် မှန်းချက်စစ်တမ်းဟာ ၂၀၁၉ မတ်လက ကောက်ယူထားတဲ့ အချက်အလက်ဖြစ်ပြီး ရာခိုင်နှုန်းအရ စိုးရိမ်ရတဲ့အနေထားဖြစ်ပါတယ်။

ရွေးကောက်ပွဲဆိုင်ရာ ပြည်သူ့လှုပ်ရှားမှု ပရိုဂရမ်မန်နေဂျာ ကိုဟန်စိုးထွန်းက “အရေးကြီးတဲ့ တွေ့ရှိချက်ကတော့ ၂၀၂၀ မှာ ရွေးကောက်ပွဲက လာတော့မယ်။ ပြည်သူလူထုက ရွေးကောက်ပွဲပေါ်မှာ ဘယ်လောက်အထိ စိတ်ဝင်စားလဲ ဆိုတာ ကျနော်တို့ သိချင်တယ်။ ရွေးကောက်ပွဲက ပြည်သူလူထုအတွက် အရေးကြီးသလား၊ အရေးမကြီးဘူးလား ဆိုတာ သိချင်တော့ ရွေးကောက်ပွဲမှာ ပါဝင်နိုင်သလား၊ မဲပေးနိုင်သလား ဆိုတဲ့ မေးခွန်းမျိုးကို ကျနော်တို့ မေးကြည့်တယ်။ ရွေးကောက်ပွဲရှိရင် ကျိန်းသေ မဲပေးမလား၊ မဲပေးဖို့ အစီအစဉ် ရှိသလား မေးတော့ ကျိန်းသေမဲပေးမယ့် ရာခိုင်နှုန်းက ၄၈ ရာခိုင်နှုန်းပဲ ရှိတယ်။ ဒီကိန်းဂဏန်းဟာ ကျနော်တို့အတွက် သတိထားသင့်တဲ့ ကိန်းဂဏန်း ဖြစ်တယ်။ ဒီကိန်းဂဏန်းဟာ မဲပေးမယ့် ကိန်းဂဏန်းတော့ မဟုတ်ဘူး။ သို့သော် ဒီမိုကရေစီမှာ တရားမျှတတဲ့ ရွေးကောက်ပွဲက အရေးကြီးတယ်။ ပြည်သူလူထု ပါဝင်ဖို့ အရေးကြီးတယ်” လို့ ပြောပါတယ်။

ဒီစစ်တမ်းကို အ‌ခြေခံပြီး ၂၀၂၀ အတွက် ပါတီနိုင်ငံရေးတွေ ကြိုတင်ပြင်ဆင်မှုတွေ ပြုသွားရမှာ ဖြစ်ပါတယ်။

ရွေးကောက်ပွဲဆိုင်ရာ ပြည်သူ့သဘောထားအမြင် စစ်တမ်းကို တနိုင်ငံလုံး အတိုင်းအတာဖြင့် မြို့နယ် ၂၃၃ မြို့နယ်မှာ ကောက်ယူခဲ့တယ်လို့ ဖော်ပြထားပါတယ်‌။

====================================

END / 251