ယူအေအီးက တူရကီတွင် ဒေါ်လာ ၁၀ ဘီလီယံ ရင်းနှီးမြှုပ်နှံ

အဲဟ်လေ့ဘိုက်(သ) (အလိုင်ဟေမွစ်စလာမ်) သတင်းဌာန ၊ အဗ်နာ




တူရကီမှာ ကန်ဒေါ်လာ ၁၀ ဘီလီယံဖိုး ရင်းနှီးမြှုပ်နှံဖို့ သဘောတူညီချက်ရခဲ့တယ်လို့ အာရပ်စော်ဘွားများပြည်ထောင်စု (ယူအေအီး) က ကြေငြာလိုက်ပါတယ်။

စွမ်းအင်၊ ကျန်းမာရေးနဲ့ စားနပ်ရိက္ခာ အပါအဝင် မဟာဗျူဟာကျတဲ့ ကဏ္ဍတွေမှာ ရင်းနှီးမြှုပ်နှံမှာပါ။ ယူအေအီးအိမ်ရှေ့မင်းသား ရှိခ် မိုဟာမက် ဘင် ဇယဒ်နဲ့ တူရကီသမ္မတ အာဒိုဂန်တို့ မနေ့က အန်ကာရာမှာ တွေ့ဆုံဆွေးနွေးမှုအတွင်း ဒီသဘောတူညီချက်ကို ရရှိခဲ့တာ ဖြစ်ပါတယ်။

ဒါဟာ ဒေသတွင်း ပြိုင်ဘက်နိုင်ငံနှစ်ခု ဆက်ဆံရေးမှာ စာမျက်နှာသစ် ဖွင့်လှစ်လိုက်နိုင်တာလည်း ဖြစ်ပါတယ်။ ယူအေအီးအစိုးရက အခုလိုရင်းနှီးမြှုပ်နှံမှု လုပ်ဆောင်တာဟာ တူရကီရဲ့ စီးပွားရေးကို အထောက်အပံ့ဖြစ်စေဖို့နဲ့ နှစ်နိုင်ငံဆက်ဆံရေး ပိုမိုကောင်းမွန်စေဖို့ဖြစ်တယ်လို့ ပြောကြားခဲ့ပါတယ်။

အိမ်ရှေ့မင်းသား ရှိခ် မိုဟာမက် ဘင် ဇယဒ်ဟာ တူရကီအစိုးရရဲ့ ဖိတ်ကြားမှုနဲ့ တူရကီနိုင်ငံ အန်ကာရာကို ရောက်ရှိနေတာဖြစ်ပါတယ်။

ဒေသတွင်းပြဿနာတစ်ချို့မှာ သဘောထားမတိုက်ဆိုင်ဘဲ ထိပ်တိုက်တွေ့ဆုံတာတွေရှိပေမယ့် နှစ်နိုင်ငံ ကုန်သွယ်ရေး၊ ပို့ဆောင်ရေး၊ ကျန်းမာရေးနဲ့ စွမ်းအင်ကဏ္ဍတွေမှာ ပိုမို ပူးပေါင်းဆောင်ရွက်နိုင်အောင် ယူအေအီးနဲ့ တူရကီတို့က ကြိုးစားလာကြပါတယ်။


*********************************************************************
END / 251