ဒေါ်အောင်ဆန်းစုကြည်နဲ့ RCSS ဥက္ကဌ ဦးယွက်စစ်တို့တွေ့ဆုံ

အဲဟ်လေ့ဘိုက်(သ) (အလိုင်ဟေမွစ်စလာမ်) သတင်းဌာန ၊ အဗ်နာ


ရန်ကုန် ၊ စက်တင်ဘာ ၁၁ ။          ။ နိုင်ငံတော်အတိုင်ပင်ခံပုဂ္ဂိုလ်  ဒေါ်အောင်ဆန်းစုကြည်နှင့် ရှမ်းပြည်ပြန်လည်ထူထောင်ရေးကောင်စီ/ ရှမ်းပြည်တပ်မတော် (RCSS/SSA) ဥက္ကဋ္ဌ ဦးယွက်စစ် တို့ ယနေ့ စက်တင်ဘာ ၁၁ ရက်နေ့ နံနက် ၁၀ နာရီခန့်က နေပြည်တော်ရှိ အမျိုးသားပြန်လည်သင့်မြတ်ရေးနှင့်ငြိမ်းချမ်းရေးဗဟိုဌာန (NRPC)၌ တွေ့ဆုံဆွေးနွေးခဲ့ကြောင်း သိရသည်။

အဆိုပါ တွေ့ဆုံမှုတွင် ပစ်ခတ်တိုက်ခိုက်မှုရပ်စဲရေးဆိုင်ရာ သဘောတူစာချုပ်(NCA)အရ အစိုးရဘက်က ဆောင်ရွက် နေသည့် ငြိမ်းချမ်းရေးလုပ်ငန်းစဉ်တွင် ယုံကြည်မှု ၊ နားလည်မှုတည်ဆောက်ရေးနှင့် တိုင်းရင်းသားနယ်မြေ ဒေသများ ဖွံ့ဖြိုးတိုးတက်ရေး၊ ပညာရေး၊ ကျန်းမာရေးနှင့် မူးယစ်ဆေးဝါးတိုက်ဖျက်ရေး ကိစ္စရပ်များကို ဆွေးနွေးကြသည်ဟု အတိုင်ပင်ခံရုံးက သတင်းထုတ်ပြန်ထားသော်လည်း အသေးစိတ်ကိုမူ ထုတ်ပြန်ခြင်းမရှိပေ။

ရှမ်းပြည်ပြန်လည်ထူထောင်ရေးကောင်စီ/ ရှမ်းပြည်တပ်မတော် (RCSS/SSA) သည် အစိုးရနှင့် NCA လက်မှတ်ရေးထိုးထားသည့် အဖွဲ့တစ်ခုဖြစ်သော်လည်း တပ်မတော်နှင့်လည်းကောင်း ပလောင်လက်နက်ကိုင်အဖွဲ့ TNLA နှင့်လည်းကောင်း မကြာခဏ  ထိတွေ့ပစ်ခတ်မှုများ ရှိနေသည့် အဖွဲ့တစ်ခုဖြစ်သည်။

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အနေဖြင့် မွန်ပြည်သစ်ပါတီ ဒုဥက္ကဥ နိုင်ဟံသာဦးဆောင်သည့် အဖွဲ့ကိုလည်း ပြီးခဲ့သည့် စက်တင်ဘာ ၁ ရက်နေ့ က နေပြည်တော်တွင်   တွေ့ဆုံခဲ့သေးသော်လည်း တွေ့ဆုံမှုရလာဒ်ကို အသေးစိတ် ထုတ်ဖော်ပြောဆိုခဲ့ခြင်းမရှိပေ။

=====================
251/ End